Ciidamadii Itoobiyaanka ee shalay ku jiray dagaalkii ka dhacay Towfiiq ayaa waxaa ay toogteen 7 qof oo rayid ah oo saaka meydadkooda laga helay goobahaasi,waxaana taasi ay ka danbeysay markii Ciidamada khasaare ay kala kulmeen dagaalkii shalay.
 

Sida ay ku warameen qaar kamid ah dadka deegaanka Towfiiq Ciidamada Itoobiyaanka waxaa ay isku soo uruuriyeen dhamaan dadkii ay qab qabteen oo wada rayid ahaa iyagoona ku toogtay Bartamaha Laamiga kadbina isaga dhaqaaqay.

Dadka la toogtay ayaa isugu jiray 2 Gaari Gacanley aheyd,2 Gaari dameer layaal ahaa iyo 3 nin oo lagala soo baxay Garaashyo ka ag dhawaa goobaha la isku dagaalay.

Falkaasi ayaa la sheegaya in ay ku dhaqaaqeen Ciidamada Itoobiyaanka kadib markii khasaare lixaad leh uu kasoo gaaray dagaalka isla markaana ay ku dhinteen in ka badan 9 Askari oo qaarkood dadka rayidka ah ay arkeen.

Inta badan waxaa Ciidamada Itoobiyaanka ay ka aargoostaan dadka rayidka ah ee Muqdisho markii waxyeelo la gaarsiiyo,waxaana la xusuustaa mudo bilooyin laga joogo iminka in Itoobiyaan lagu qarxiyay agagaarka Shiir Kolle ay guryihii ka ag dhawaa kala soo baxeen dad ayna laamiga ku toogteen dadkaasina waxaa kamid ahaa 3 wiil oo wada dhalatay.