Wasiirka arrimaha dibada Jabuuti ayaa sheegay inay diyaar u yihiin inay ku soo biiraan howl galka Amisom si loo taageero dowladda soomaaliya,

(15-08-2009)Dowladda Jabuuti ayaa shaaca ka qaaday inay diyaarisay hal guuto oo ciidamo ah oo qeyb ka noqon doona ciidamada Amisom ee ku sugan magaalada Muqdisho, si ay xoojin ugu noqdaan dowladda soomaaliya oo wajaheysa weeraro uga imaanaya mucaaradka.

Wasiirka arrimaha dibada Jabuuti ayaa sheegay inay diyaar u yihiin inay ku soo biiraan howl galka Amisom si loo taageero dowladda soomaaliya, waxaana hadalkan uu ka sheegay magaalada Kampala ee dalka Uganda xilli uu kula kulmayay Wasiirka arrimaha dibada Uganda.

Maxamed cali Yuusuf ayaa sheegay in ay rajeynayaan in howl galka nabad ilaalinta Amisom uu guuleysto, si dowladda soomaaliya ee wadankeeda lagu soo dhisay lugaheeda ugu istaagto.

Wasiirka ayaa uga mahad celiyay kaalinta ciidamada ka socda Uganda iyo Brundi ka qaataan howlaha nabad ilaalin ee soomaaliya iyo taageerada ay siinayaan dowladda kmg.

Dowladda Jabuuti ayaa dhowaan magaalada muqdisho u soo dirsatay saraakiil u kuur galayay xaalada magaalada si ciidamo ka socda Jabuuti u soo gaaraan,waxaana sidoo kale beryihii ugu dambeeyey isa soo tarayay warar sheegayey in Ciidamo ka socda wadanka Jabuuti ay safka hore ka geli doonaan dagaalka ay dowladdu kula jirto kooxaha Mucaaradka, wararkaasi oo maanta si rasmi ah u soo baxay.

Xuseen Cali  Nuur " Mogadishu"

"cigonet.com"